社總消息
社總觀點
(小學輔導服務關注組)《社總特約:開市第一擊》之「小學社工投標」

 

登登登凳!大家好,又到學校社工服務機構一年一度落TENDER既旺季了,相信相關既同工呢排都會好忙,做DIRECT SERVICE之餘又俾老細卒出一份又一份標書,適逢今年落實小學「一校一社工」喎,咁應該百花齊放啦,不如小編同大家一齊睇下今年有乜野好BID先!

 

【招標文件內容】


由於時間關係,小編揀咗浸信會天虹小學既招標文件(https://www.rainbow.edu.hk/…/u…/2018/05/BRPS-1718-GDT-02.pdf),同大家分析下今年既行情先。呢份招標文件重點有以下六個:


1. 合約為期三年


2. 承投價格上限為港幣90萬


3. 需派三位全職學位社工(具工作經驗的學位社工)


4. 需有三年或以上有關工作經驗(曾有駐校服務者優先)


5. 投標價格需包括駐校社工的所有薪酬、強積金、保險費、介紹服務費及有關活動的一切所需費用。


6. 同時誠邀機構在標書中增加「咨詢服務」的報價

 

【90萬上限的由來】


相信大家會留意到第一個數字:90萬,呢個數係點嚟架呢?首先,我哋要知道教育局在四月廿七日向小學發出關於「一校一社工」政策既通函入面(http://applications.edb.gov.hk/…/uplo…/EDBCM/EDBCM18036C.pdf),列明「學校社會工作服務津貼」額係參照助理社會工作主任(ASWO)既中點薪金而釐定。以2017 - 18 年的薪金水平計算,全年金額為$583,560。此外,開12班或以上既學校會獲取「額外津貼」,每班$17,402。天虹小學既招標文件講明,下年會開22班,咁佢哋會攞到教育局11份既「額外津貼」,合共$191,422。第三筆錢來自「諮詢服務津貼」,以資助學校購買諮詢、督導或其他支援學校社工的相關服務,金額係$118,629。

 

等小編攞個算盤出嚟先!嗒嗒嗒嗒嗒,計好!三份錢加埋既總金額係$893,611元,校董會竟然大拿拿自行撥出$6,389,好意頭齊頭九十萬,各大機構主管係咪好開心呢!不過講明先吖,我見班機構主管平日見面都不時批踭搶位,話唔定為咗攞到支標,學「宜家傢俬」一樣,落個「創新低價」呢!八十萬?七十萬?哈哈,各位同工,記得寫好標書後就唔好周圍同人講呀,圍標係犯法架!

 

【六折支薪?!】


不過小編都要幫手計下數既,天虹小學係要服務機構提供3個有三年經驗既A仔,再加共用1位有十年以上ASWO經驗既SWO級同工提供督導同緊急支援。如果只用頭兩份錢(「學校社會工作服務津貼」及「額外津貼」:$583,560+$191,422),即係用$774,982去請3個三年經驗既A仔,因為要計埋5%強積金,每人每月實得薪金係$20,502,比MPS既PT.9仲要少$148。咪住,PT.9呢個數好熟喎?咦,諗諗先,呢個咪就係SWA既起薪點囉!乜唔係請三年經驗A仔咩?ASWO起薪點加3個PT(PT.19)應該係$35,085喎,差額有成$14,583,咁即係用六折唔夠既人工,去請一個符合招標文件要求既三年經驗學位社工。究竟純粹係天虹小學校長唔知價,定係有心剝削社工先?基於社會工作者對人性既信念(講咗等於無講),小編姑且信住係佢哋係唔知價先啦(又係講咗等於無講)!

 

【諮詢服務津貼,點用?】


老老實實,咁既價錢,好難請到合資格既同工喎,咁份標書大家點寫好先?咦,不如用埋「諮詢服務津貼」$118,629用來請同工囉,最多叫自己老細提供「免費」督導,橫掂佢都有FSA錢出糧俾佢啦,咪唔使額外請個SWO做督導啦!拿拿拿,又唔好話小編無提你呀!咁係交叉補貼(Cross Subsidy),會俾社署同審計署捉犯規架。

 

雖則教育局講明「諮詢服務津貼」係專項津貼,一定要用於購買督導服務,唔可以補貼其他項目,但學校找左數俾機構,就唔會理機構點樣出糧,到時教育局見到學校有社工返工,啲文件有督導簽名咪過關囉!但咁仲算係專項津貼咩?唔理啦!LSG經常都係咁架啦,你同我第一日做社工咩!

 

小編講人工講得太興奮了,爭啲睇漏咗呢幾個字:「投標價格需包括….有關活動的一切所需費用」。嘩嘩嘩(很重要所要嘩三次)!原來要包埋PROGRAMME FEE架?一間小學22班話大唔大話細唔細,一年搞七八次活動,都要幾萬蚊喎。咁咪連PT.9都出唔到請人?老老實實,咁個標仲落唔落先?不過就算你唔落我唔落,仲有千千萬萬既機構排住隊落,我同你都係掩住良心填埋份標書先啦!

 

【回歸起薪點?外行領導內行的後果】


唔只係學校招標出事,最近小編從社總權益部得知,有校長想用「一校一社工」既津貼,繼續以自行聘用方式,與任職多年既現職學校社工續約,但校長問教育局計糧組點計佢人工,答案係完全唔計果位同工既社工經驗,因為學校咁多年來唔係用ASWO呢個職位請佢,所以學校要由起薪點PT.16重新請番佢,足足CUT左6,7個PT. 你都咪話唔傷。睇番今次小學「一校一社工」係由勞福局踢個波俾教育局出台,唔係現行中學社工或計劃中既幼教社工咁係由社會福利署統籌。以上減薪續聘事件就睇得出教育局根本唔認識社工專業,單係計算經驗同計糧就已經出事,莫講話教育局未來有無能力去統籌好小學社工服務。咁仲話「一校一社工」係林鄭做特首既德政?奶媽,你咪同IQ160一齊搞笑啦!真係一啲都唔好笑架!

 

【結語:教育界也逃不過整筆撥款魔掌】


睇番天虹小學而家已經用緊兩位社工去照顧學生需要,學校計劃下學年用「一校一社工」既資源,去請三個社工提供服務。從招標文件可見,三位社工要照顧校內既SEN(特殊學習需要)同SLD(特殊學習障礙)學生,亦要跟進一般性質既輔導個案,又要上埋成長課,搞埋家長支援同教師支援既工作坊,咁唔用三個社工真係搞佢哋唔掂。但係教育局下學年向小學提供既「一校一社工」資源,只係取代左原本學校現有輔導既資源,同社總以及其他專業團體一直主張政府應為每小學提供一位社工加一位學生輔導主任,並保留現有輔導資源既訴求所去甚遠,根本遠遠不足以應付現時各小學對社工及輔導服務需求。天虹小學既招標文件,正正就係為禍社福界多年整筆撥款「靈活性」同投標制弊端既縮影,政府既角色,就係俾一舊錢加上價得者低原則去開展社會服務,之後就乜都唔理,既無訂立社工既標準薪酬水平,亦無審視實際服務需要,俾機構同學校一個蓋去冚三個樽,任由佢哋用海鮮價請人,而前線社工就繼續做一隻隻待宰的羔羊。

 

小編希望各位同工可以明白,點解社總一直同政府砌LSG既仗打足十八年都唔放手!在呢條與LSG抗爭既路上,小編呼籲社福同工繼續團結,支持社總工作,多謝大家支持,啪啪啪啪啪!