黃旭熙 

社總內務副會長 社總幼兒教育社工關注組

主席，各位議員：

我今日帶左一位同工嚟，大家都會叫佢做聰明笨伯。其實佢既全名係：「被IQ超過160既聰明人領導既勞工及福利局搵左笨18年既社工伯伯」

呢位伯伯究竟點俾人搵笨呢？話說十八年前，當整筆撥款制度開始推行既時候，總幹事同佢講，呢個制度好靈活架，機構可以因應社會變化，將資助用黎開展創新服務。結果真係請多左同事番黎做新服務喎，但寫字樓就越坐越逼，中央部門包括ＩＴ部、會計部、人事部都因為機構服務膨漲，要請額外人手應付，但整筆撥款故明思義係得咁大舊錢，咁錢從何來呢？咪要削減前線既資源、例如用文憑社工既薪酬請學位社工、又或者將一個社工職級，變成社工一、二、三、四級，粗暴咁限制同工加人工既速度同幅度。

後來總幹事話，社署再唔准將整筆撥款既錢，用係非津助服務協議(non-FSA)所指定既服務，指咁樣做係「交叉補貼」。於是總幹事就叫聰明笨伯去寫一份又一份既計劃書，以「先導計劃」名義，出去申請基金，但呢啲基金往往只准用係前線服務，唔包括請中央行政人手，又唔可以攞去租既辦公室同服務場地，兼且設有兩年或三年既服務限期。完成左既先導計劃就算幾有成效都好，最終能夠被社署納入為恒常資助既項目，卻係鳳毛麟角，而同工就要繼續寫更多既計劃書去延續好有需要同成效既服務。

整筆撥款就好似一碗車仔麵個碗咁，一開始個碗入面只係包兩個餸一個麵，唔夠食要叫多幾個餸的話，個碗都係得咁大個。為左裝得晒所有食材，唯有每粒魚旦整細粒啲，每舊豬紅切細啲，呢啲細舊左既魚旦豬紅，就係我哋同事份人工。一旦放左唔係餐牌既送落個碗度，就係犯規。局長，究竟點先可以俾我哋食得安安樂樂呢？

十八年來，政府無做過一次全面既社福規劃，整筆撥款既資源，往往停留係應付十八年前既社會需要，呢十八年累積既服務斷層，都係由社福界自己搵資源去填埔。我哋班同工雖然長期被剝削，不過依然係咁抵得諗，因為實在唔忍心見到市民得唔到適切既幫助，但一個唔覺意，又俾政府話係交叉補貼，係犯規。我想講，你哋明知道問題係來自你哋一手設計既整筆撥款制度，但就將責任推得一乾二淨。呢位聰明笨伯，仲唔係俾聰明人領導既勞福局搵笨咩？

主席、各位議員，社總要求政府立即取消百病叢生、推卸責任既整筆撥款制度！